သံဃာပြစ်မှားသူတို့နိဂုံး (၂)

“လောက၌မကောင်းမှုပြုလုပ်သူအားစိတ်ကွယ်ရာအရပ်မရှိ”(သီလ၀ီမံသနဇာတက)
၇။
လူ့လောကမှာတရားဥပဒေဟာမျက်နှာကြီးရာဟင်းဖတ်ပါတတ်ပေမယ့်၊ငရဲမင်းကတော့ဘယ်သူ့ကိုမျှမျက်နှာမလိုက်ပါဘူး။လူ့လောကကတရားသူကြီးအချို့တရားမျှတမှုမရှိကြပေမယ့်၊သေမင်းတို့၊ငရဲမင်းတို့ကတော့လုံးဝတရားမျှတကြပါတယ်။အပြစ်ဆိုတဲ့တရားသူကြီးကတော့…….လက်ဆောင်ပေးတဲ့သူမို့၊ငွေများများပေးနိုင်တဲ့သူမို့၊ချမ်းသာတဲ့သူမို့၊သူဋ္ဌေးသားမို့၊အရာရှိသားမို့၊တရားသူကြီးသားမို့၊၀န်ကြီးသားမို့၊ရှင်ဘုရင်သားမို့၊ရှင်ဘုရင်မို့ဆိုပြီးပြစ်ဒဏ်လျော့ပေါ့ပေးမှာမဟုတ်သလို၊လူစားလဲပေးမှာလည်းမဟုတ်ပါဘူး။

“တရားဥပဒေသည်ဆင်းရဲသူကိုအနိုင်ကျင့်ပြီးချမ်းသာသူကိုမျက်နှာသာပေးသည်”ဆိုတဲ့အတိုင်းဆင်းရဲသူကိုအနိုင်ကျင့်ပြီးချမ်းသာသူကိုအခွင့်အရေးပေးတာလူ့လောကမှာပဲရှိပါတယ်။တရားဥပဒေအထက်မှာတရားသူကြီးရှိတတ်ပေမယ့်သေမင်းဆိုတဲ့တရားသူကြီးအထက်မှာတော့ဘယ်သူမှမရှိပါဘူး။မြေနိမ့်ရာလှံစိုက်တတ်တဲ့အစားထဲမှာသေမင်းတို့ငရဲမင်းတို့မပါပါဘူး။”ငါကသူဋ္ဌေးသား……၀န်ကြီးသား…..ဘုရင့်သားဆိုပြီး….လူ့လောကမှာလူတိုင်းကိုပမာမခန့်တဲ့အကြည့်နဲ့ကြည့်သလိုသေမင်းကိုသွားကြည့်လို့ကတော့တစ်ခါတည်းဂွမ်းသွားမယ်မှတ်ပါ”။

ချမ်းသာတဲ့သူပဲဖြစ်ဖြစ်၊ဆင်းရဲတဲ့သူပဲဖြစ်ဖြစ်၊ရှင်ဘုရင်ပဲဖြစ်ဖြစ်၊ပြည်သူပြည်သားပဲဖြစ်ဖြစ်မည်သူမဆိုမကောင်းတဲ့ပြစ်မှုကြူးလွန်လျှင်မကောင်းတဲ့အကျိုးတရားတွေကနေမလွတ်ပါဘူး။လူ့လောကမှာလိုအပြစ်လွတ်အောင်ရှောင်ပြေးလို့မရပါဘူး။အပြစ်လွတ်ချင်လို့”ကောင်းကင်မှာပဲသွားပြီးနေနေ၊တောထဲမှာပဲသွားနေနေ၊သမုဒ္ဒရာအလည်မှာပဲသွားနေနေ၊ရေအောက်မှာအိမ်ဆောက်ပြီးနေနေ၊ဘုံခုနှစ်ဆင့်ပေါ်မှာပဲတက်နေနေ၊နေချင်တဲ့နေရာသွားနေနေမကောင်းမှုကံကနေမလွတ်ပါဘူး”။ဘယ်နေရာမှာသွားပြီးတော့ပုန်းပုန်းမရပါဘူး။

၈။
သုပ္ပဗုဒ္ဓ(သုပ်ပဗုဒ်ဓ)ဆိုတာသိဒ္ဓတ္ထမင်းသားရဲ့ယောက်ခမ၊ယသော်ဓရာနှင့်ဒေ၀ဒတ်တို့ရဲ့ဖခင်ဖြစ်ပါတယ်။လူ့လောကအရပြောမယ်ဆိုလျှင်သူဟာသာမန်ပုဂ္ဂိုလ်မဟုတ်ပါဘူး၊ရှင်ဘုရင်တစ်ယောက်ပါ။သူ့သမီးကိုသားတစ်ယောက်နဲ့ထားခဲ့ပြီးတောထွက်သွားတယ်၊သားဖြစ်တဲ့ဒေ၀ဒတ်ကိုလည်းယောက်ဖဖြစ်လျှက်နဲ့ရန်သူလိုသဘောထားတယ်ဆိုပြီးမြတ်စွာဘုရားကိုရန်ငြှိုးအာဃာတဖွဲ့ထားတဲ့ဘုရင်တစ်ပါး။

တစ်နေ့တော့သုပ္ပဗုဒ္ဓဟာမြတ်စွာဘုရားနှင့်သံဃာတော်တွေဆွမ်းခံ၊ဆွမ်းစားကြွမည့်လမ်းကိုပိတ်ထားပါတယ်။မြတ်စွာဘုရားနှင့်သံဃာတော်တွေကြွလာတဲ့အခါမှာလမ်းမဖယ်ပေးပါဘူး။ဘယ်လိုပြောပြောလမ်းမဖယ်ပေးပါဘူး။နောက်ဆုံးမြတ်စွာဘုရားနှင့်သံဃာတွေဟာလှည့်ပြန်သွားပါတယ်။(သုပ္ပဗုဒ္ဓဘုရင်ကမြတ်စွာဘုရားနဲ့သံဃာတွေကိုလမ်းပိတ်ရုံလေးပါ။သေနတ်နဲ့ပစ်တာမဟုတ်ဘူးဆိုတာကိုတော့သတိရှပ်ထားစေလိုပါတယ်….။)အဲ့ဒီအခါမှာမြတ်စွာဘုရားပြုံးတော်မူတာကိုတွေ့ပြီးအရှင်အာနန္ဒာကမေးလျှောက်ပါတယ်။ပြုံးတော်မူခြင်းရဲ့အကြောင်းကဘာလဲအရှင်ဘုရား။

သုပ္ပဗုဒ္ဓဟာမပြုသင့်တဲ့အမှုကိုပြုလိုက်ပြီ၊အဲ့ဒီအကျိုးဆက်ကြောင့်နောက်ခုနှစ်ရက်ပြည့်လျှင်မြေမြိုလိမ့်မယ်လို့မိန့်လိုက်တာကိုကြားပြီးသုပ္ပဗုဒ္ဓကစဉ်းစားပါတယ်။”ငါ့တူဂေါတမပြောတဲ့စကားတွေကအမြဲတမ်းမှန်တယ်၊ခုငါ့ကိုလည်းမြေမြိုလိမ့်မယ်လို့ပြောတယ်၊ဘုံခုနှစ်ဆင့်ပေါ်တက်နေလျှင်ဘာတတ်နိုင်မလဲ။မြေမမြိုလို့ကတော့ဂေါတမကိုမုသာဝါဒနဲ့စွပ်စွဲပစ်မယ်”။

ပြီးတော့…….မြေမမြိုရလေအောင်ဆိုပြီးဘုံခုနှစ်ဆင့်ပေါ်မှာတက်နေပါတယ်။မြတ်စွာဘုရားတို့မည်သည်နှစ်ခွန်းနှစ်ခွသောစကားကိုပြောရုံးမရှိပါဘူး။ခုနှစ်ရက်ပြည့်တဲ့နေ့မှာတော့သုပ္ပဗုဒ္ဓမြေမြိုပြီးအ၀ီစိရောက်သွားပါတယ်။

၉။
တကယ်တော့သုပ္ပဗုဒ္ဓမြေမြိုသွားတာဟာသူပြုလုပ်ခဲ့တဲ့အကုသိုလ်ကြောင့်ပါ။တန်ခိုးရှင်တစ်ဦးဦးကမြေမြိုစေဆိုပြီးပြောလိုက်လို့မြေမြိုသွားတာမဟုတ်ပါဘူး။မည်သည့်ပုဂ္ဂိုလ်တစ်ဦးတစ်ယောက်ကမျှဘာပြစ်ဒဏ်ခံစေ၊ညာပြစ်ဒဏ်ခံစေဆိုပြီးတော့လည်းပြောလို့မရပါဘူး။ပြီးတော့…..မည်သည့်တန်ခိုးရှင်၊မည်သည့်ပုဂ္ဂိုလ်တစ်ဦးတစ်ယောက်ကမျှအပြစ်ဒဏ်ပေါ့သွားအောင်လုပ်ပေးလို့လည်းမရပါဘူး။လုပ်ပေးလို့ရစတမ်းဆို….ရှင်းရှင်းလေးပဲ။

မြတ်စွာဘုရားရှင်လောက်တန်ခိုးအရာမှာပြည့်စုံတဲ့သူရှိပါအုံးမလား။သုပ္ပဗုဒ္ဓဆိုတာမြတ်စွာဘုရားရဲ့ဦးရီးတော်ဖြစ်သလို၊ယောက်ခမလည်းဖြစ်ပါတယ်။ဒီလောက်ဆွေမျိုးတော်နေတာလောက်နဲ့တင်သုပ္ပဗုဒ္ဓရဲ့အပြစ်တွေကိုပေါ့လျော့သွားအောင်တန်ခိုးနဲ့လုပ်ပေးလို့ရနေပါပြီ။ဒါပေမဲ့မြတ်ဗုဒ္ဓဟာသုပ္ပဗုဒ္ဓကြူးလွန်ခဲ့တဲ့အပြစ်တွေကိုပေါ့လျော့သွားအောင်မလုပ်ပေးနိုင်ခဲ့ပါဘူး။ဘာဖြစ်လို့လည်းဆိုတော့အပြစ်မှာဆွေမျိုးမရှိလို့ပါပဲ။ဒါ့အပြင်…..ပုဂ္ဂိုလ်တစ်ဦးတစ်ယောက်ကိုဘာပြစ်ဒဏ်ကျစေ၊ညာပြစ်ဒဏ်ကျစေဆိုပြီးသူကိုင်တိုင်သတ်မှတ်ပြဋ္ဌာန်းပေးခဲ့တာမဟုတ်လို့ပါပဲ။

၁၀။
မြတ်ဗုဒ္ဓရဲ့ကမ္မ၀ါဒဆိုတာကိုယ်လုပ်တဲ့အလုပ်ကိုကိုယ်ကိုယ်တိုင်တာဝန်ယူရတဲ့အလုပ်ပါ။ကိုယ်လုပ်လိုက်တဲ့အလုပ်ဟာကောင်းကောင်း၊ဆိုးဆိုးကိုယ်နဲ့ပဲဆိုင်ပါတယ်။ကံဆိုတာလောကသဘာဝလိုကိုယ့်ရဲ့အရှုပ်ထုတ်တွေကိုသူတစ်ပါးအပေါ်ပစ်ချလိုက်လို့၊လွှဲချပစ်လိုက်လို့ရတဲ့အရာမဟုတ်ပါဘူး။ဒါ့အပြင်…ကံဆိုတာပုဂ္ဂိုလ်တစ်ဦးတစ်ယောက်အပေါ်”အမြင်ကတ်တဲ့ပုဒ်မတပ်ပြီးတော့”ဘယ်တော့မှမတရားပြစ်ဒဏ်မချတတ်ပါဘူး။

တကယ်တော့….ကံဆိုတာ….”လောကမှာရှိတဲ့လူတွေလို…ကိုယ်အမြင်ကတ်တဲ့လူတစ်ယောက်ကောင်းတာလုပ်တဲ့အခါမှာမသိချင်ယောင်၊မမြင်ချင်ယောင်ဆောင်တတ်သလောက်၊ကိုယ်အမြင်ကတ်တဲ့လူတစ်ယောက်မကောင်းတာလုပ်ရင်တော့….တစ်စိတ်ကိုတစ်အိတ်လုပ်…ဂျပိုးကိုလိပ်ဖြစ်အောင်လုပ်ပြီး….ငပိရည်ကိုရဲယိုရွက်နဲ့…….အားပါးတရစွဲသလိုစွဲတတ်တဲ့အမျိုးအစားလည်းမဟုတ်သလို၊ခုတစ်မျိုး၊တော်ကြာတစ်မျိုး၊ကြိုက်တစ်မျိုး၊မကြိုက်တစ်မျိုး၊နှစ်မျိုးပြောင်းလဲတတ်တဲ့လျှာနှစ်ခွရှိတဲ့သူလည်းမဟုတ်ပါဘူး”။ဘာ့ကြောင့်လည်းဆိုတော့ကံတရားမှာ……ချစ်ခြင်း….မုန်းခြင်း..စတဲ့အဂတိတရားတွေကင်းလို့ပါပဲ။

****************************************************
ကျမ်းကိုး..........
ဓမ္မပဒအဋ္ဌကထာ
ဇာတကဋ္ဌကထာ
************************************
အားလုံးပျော်ရွှင်ကြပါစေ..............

သာကီဝင်
Kandy, Sri Lanka
__________________________________

Sri Sumangala Sami ၏ စာမျက်နှာမှ ကူးယူဖော်ပြပါသည်။
(ဗဟုသုတ ဟင်းပေါင်းအိုးကြီး)

https://www.facebook.com/308669855916817/photos/a.314647161985753.73088.308669